Some suspected herdsmen don set fire for more than 20,000 hectares of rice farm wen belong to Benue State Governor Samuel Ortom for Guma Local Government Area of d state. Wen the governor dey yarn wit news people for one telephone, he come talk say he neva harvest him rice farm, before the suspected herdsmen set fire put. According to reports, dis one na the fourth time wen dem dey attack Ortom farms.

The Nigeria Police Force don talk say their operatives wen dem send to go arrest Senator Dino Melaye for him bonk no go comot from there until the Senator surrender himself for arrest and investigation. The Police wen download dis informate yesterday come talk say Senator Dino Melaye dey wanted by the Police becos he jump comot from their motor becos he wan dodge arrest and also becos him and him jaguda dem shoot one Sergeant Danjuma Saliu for the month of July, 2018. Wen d force’ Public Relations Officer, Jimoh Moshood come dey yarn for d Force Headquarters for Abuja, he come talk say dem no go comot from there until Melaye surrender himself for arrest and investigation. One Washington-based group, International Strategic Studies Association ISSA, don talk say the death of one before before chief of Air Staff, Air Chief Marshal Alex Badeh, and one before before Chief of Administration of the Nigerian Army, Maj.-Gen. Idris Alkali, no be something wen just happen like dat. According to reports, na one gang of youths wen dey protest for along Jos-Bauchi Road nia kpuff Alkali on September 3, while some badoo dem come kpuff Badeh for along the Abuja-Keffi Road on December 18. ISSA, wen be one non-governmental organization wen dey involve for national and international security and strategic policy, talk for one special report dis past weekend say dem kpuff the two men to hide wetin dem describe as the pattern of corruption for the current military leadership for Naija.

Festus Keyamo, spokesman for President Muhammadu Buhari Campaign Organisation don tell Atiku Abubakar, presidential candidate of the Peoples Democratic Party (PDP), say make he stop to dey lie against Buhari if he no get evidence. Keyamo yarn dis one wen he dey react to the demand wen Atiku make say make security agencies probe Buhari family concerning d ownership of substantial shares for Etisalat Nigeria and Keystone Bank.   Wen the senior advocate of Nigeria (SAN) come dey yarn yesterday, he come accuse the PDP say dem dey spread fake news, and say their candidate no gree issue personal statement up till this minute wen carry details of him record of serious corruption and abuse of office”.  

Coalition of United Political Parties don file legal action against President Muhammadu Buhari and the Police Service Commission becos of wetin dem call plot to extend the tenure of the Inspector General of Police, Ibrahim Idris, by six months. For one press conference wen shele for Owerri yesterday, the CUPP spokesperson, Ikenga Ugochinyere talk say the opposition parties get am for good authority say the president wan extend the IG tenure wen suppose retire on January 15, 2019. Ugochinyere come accuse the National chairmo of the All Progressives Congress APC Adams Oshiomhole and other APC big gbogons dem say na dem nia dey lead the campaign for d extension of the IG tenure.

The Senior Special Assistant to the President on top Media and Publicity, Garba Shehu, don explain how the Muhammadu Buhari administration take use d $322m wen dem recover from late Gen. Sani Abacha family. Wen Shehu dey yarn for Abuja, he come talk say dem use the dough take make the Conditional Cash Transfer of monthly amount of N5,000 to more than 300,000 poor homes for across the nation under the Social Investment Programme wen the Federal Government introduce. He come talk say the spending so dey in line with the Memorandum of Understanding wen the governments of Nigeria and Switzerland sign as condition wen dem take release the kpogri.

The All Progressives Congress (APC) don talk say Alhaji Atiku Abubakar, d presidential candidate of the Peoples Democratic Party (PDP), dey show “early signs of depression. Na Lanre Issa-Onilu wen be talk talk person for d APC nia yarn dis one wen he dey respond to wetin one of the aides of Atiku talk. Wen Phrank Shaibu, special assistant to the PDP presidential candidate dey voice wit news people, he come talk security agencies need to probe d link between President Muhammadu Buhari and Etisalat Nigeria. But Issa-Onilu don tell Atiku to tell Nigerians why he wan really be president instead “of am to dey raise any how any how allegations every day by day.

Democratic Republic of Congo health ministry say 24 Ebola patients don shalay comot from one Ebola treatment center where dem for take dey receive treatment for Beni yesterday. The patients gats borrow leg after people wen dey protest the cancellation of on Sunday presidential election for the eastern city attack d place. D ministry spokeswoman Jessica Ilunga come clear news people say 17 of the patients don already test negative for Ebola, while dem neva test seven at all.

The Nigerian Army don admit say many police officers gbes without official permission from one counter-insurgency training facility for Yobe State. This one no be d same tin wit wetin d police first talk as dem take deny say no officers run wit weapons as dem take report am on Wednesday afternoon. The army say dem gbab some of the officers for Damaturu, the capital of Yobe State about 60 kilometres away from the training centre for Buni Yadi.