Based on the Christmas wen dey come, the Economic and Financial Crimes Commission EFCC don launch total war on Yahoo Boys. The operation wen dem codename ‘Cyber Storm’, go involve EFCC operatives wen go dey monitor deals wen no pure especially d ones wen youths dey run and yet dem no go fit explain how dem take make their money. The commission come say dem go still push their agents go nightclubs and concerts where youths dey normally dey go “pop” expensive champagne.

To overcome the “serious revenue challenge” wen d country experience for the 2017 and 2018 budgets implementation, the federal government yesterday talk say dem don declare state of emergency on top money wen the country dey make. Na Director-General for d Budget Office of the Federation, Mr. Ben Akabueze, nia yarn dis one during one town hall meeting wen he get with Chief Executive Officer (CEOs) of enterprises (GOEs) for Abuja. Mr. Akabueze come talk say the government no get any option than to force revenue generation agencies to submit their operating surpluses put for the national account, even as dem dey make sure say stronger enforcement action dey against people wen march line on top tax matters.

Some people wen dey long side for Nasarawa state don clear Amnesty International (AI) say olokpa dem wen federal government send go their communities to go stop attacks wen suspected herdsmen dey carry out on dem tell dem to pay N150,000. The people make d complain for one report wen AI release on top the gbege wen dey play between farmers and herdsmen for the country. For the report wen dem release on Monday, the villagers say the kpokpo wen dem push from the force criminal intelligence and investigation department tell dem to pay the money for “logistics”. Meanwhile Jimoh Moshood, wen be talk talp person for d Nigeria police force don talk say nothing like dat.

Tunde Fowler wen  be the executive chairmo for Federal Inland Revenue Service (FIRS) don talk say the service don make N5 trillion within 50 weeks for d year 2018. Wen Fowler dey yarn yesterday for Abuja, he come talk say FIRS don record ogbonge achievements becos of d maximum support from the presidency and d ministry of finance. He come talk say the agency dey aim to make N5.3 trillion by the end of the year. Whereas the current highest amount for FIRS history na N5.07 trillion wen dem make for d year 2012.

Uche Secondus wen be d national chairmo of the Peoples Democratic Party (PDP), don accuse the federal government say dem dey cause casala for states wen the PDP dey control ahead of the 2019 elections. Wen the opposition leader dey yarn yesterday, he come talk say the federal government don enter agreement with the Economic and Financial Crimes Commission (EFCC) and the police to finish PDP states unto say dem wan make sure say d PDP lose focus for the 2019 elections. He come talk dis one wen federal government dey wan do so na part of the grand design wen dem get to take distract the PDP from their focused journey to reclaim power and also rescue this country.

President Muhammadu Buhari don tell him supporters say make dem no worry say he go reward dem well for their loyalty if dem re-elect am for the year 2019. Na yesterday nia oga Buhari for take make the promise for Abuja when he dey deliver one speech for the inauguration of him support group, ‘Together Nigeria’. Na Buhari Support Organisation (BSO) nia organize the event.