Na Sergio Aguero nia be Inter Milan ‘dream’ attacking target this summer as boss Antonio Conte dey reason to make three key areas of him squad more cajad. The Manchester City legend go leave the club on top free transfer by the end of the season after dem clear am say dem no go renew him contract. Some top clubs don dey show interest to kpake Aguero, with Chelsea and Barcelona wen dey among the European giants wen dey reason to offer am one fresh challenge.
Governor Okowa go commission Orhrerhe/Otokutu road
Governor Ifeanyi Okowa go commission the Ohrerhe/Otokutu access road phase one, Agbarho for Ughelli North Local Government Area by tomorrow the 29th of April around 9 in d morning. This one na according to one statement wen Olorogun Gilbert Afatakpa Omos, Presido of Ohrerhe Community drop, den as he dey talk, he come hail the governor for d way wen he take dey develop the area. He come call on d sons and daughters of the community wen mean well for the community plus including the general public say make dem gather come out come welcome and appreciate the governor for the d way wen he take complete the access road.
No dey stir up religious crises-CAN warn some Muslim leaders
The Christian Association of Nigeria CAN don warn some Muslim leaders for the country say make dem no dey continue to dey promote violence and trouble so dat religious gbege no go burst out. Na the General Seceto of CAN, Joseph Daramola nia give d warning for one statement wen he title ‘Muslims should stop stirring up religious crisis in Nigeria’. Even as CAN dey tell the security agencies to caution and prevent any group of people when e be say their actions go fit lead to religious and social crises and violence for the country, the organisation come talk say e dey pain say for all over Naija, e get some actions wen some Islamic leaders dey take to provoke their Christian counterparts to anger.
2023 Elections: APC plan na to manipulate am-Wike
Nyesom Wike, d governor of Rivers state, don talk say the delay for the passage of the electoral act amendment bill na plan wen the All Progressives Congress (APC) get to manipulate the 2023 elections. Wen Wike dey yarn for one television interview on Tuesday, he come talk say the delay for the passage of the bill na strategy of the ruling party to take do mago mago for future elections. Na the eight national assembly nia initially introduce the electoral act amendment bill under the leadership of Bukola Saraki, but President Muhammadu Buhari lock up am three times back to back. For the ninth senate, dem come reintroduce the bill but d only thing be say na postponements dem wan come use take finish him destiny.
Dis no be time to impeach Buhari-Mohammed Musa
Mohammed Sani Musa, d senator wen dey represent Niger East don talk say dis one no be the time for any motion wen dey seek the impeachment of President Muhammadu Buhari. Wen Musa dey raport with news people for Abuja on Tuesday, he come talk say impeachment na another “crisis” wen the country no need. Musa yarn dis one after dem ask am why lawmakers neva make any move to remove Buhari from office becos of d security situation wen dey worse for Naija.
Peace for Warri-South na my first agenda-Tidi
Chairmo of Warri South Local Government Area, Dr. Michael Tidi, don talk say peace and security na the first agenda of him policy drive, say the Executive of Warri South Council, no go lia lia allow communities for the local government area to dey take powers wen dem no get, he come give warning say make nobody stop security agents from carrying out their legitimate assignment for the communities. Na the Warri South Local Government Chief Security Officer nia yarn dis one on Tuesday for the Warri South Council Main Secretariat for Warri, when he dey inaugurate five new Supervisors wen go handle different departments for Warri South Local Government Council. Even as Dr. Tidi dey talk say he no go think am twice before he chase any Supervisor wen error as d person dey carry out him assignment, he come tell the supervisors wen dem newly inaugurate to bring in fresh ideas wen go move the administration forward, and dis one na even as he tell the Supervisor for Environment to carry the environmental sanitation drive of him administration go the rural and urban areas of Warri South Council. Ms Patricia Edun, nia be d Supervisor for Environment, while Sunny Bodor, Oghenetega Kokoyo, Egboboyen Eniye and Sunny Mabiaku Omene, nia dey handle Health, Agriculture, Education as well as Youth, Sports and Culture, respectively.
Delta state: Government ask civil servants wen dey lower grades to resume
Delta State Government don direct officers wen dey for grade levels 12 and below to resume duties. Na the Commissioner for Information, Mr Charles Aniagwu nia give d order for one statement for Asaba. He come talk say d order show after Governor Ifeanyi Okowa give approval for workers wen dey for grade levels 12 and below wen don dey for house as part of measures to check the spread of COVID-19, to return back to work on Wednesday.
Naija Army don warn against sharing soldiers wen die pictures for social media
The Nigerian Army don threaten say dem go take legal actions against those people wen dey share photos of soldiers wen kpeff for social media and dis one na according to d Director Army Public Relations, Brigadier General, Mohammed Yerima. The matter na say pictures and videos of soldiers wen insurgents and criminals kpuff for Rivers, Borno and other states show of late for social media. But for one statement on Tuesday, the Army come condemn d matter totally, say e dey wrong to dey share d pictures and videos of personnel when pay the supreme price even as dem dey defend and protect the country from winchi winchi people.
We no go give kidnappers ransom- Nasir El-Rufai
Again, Kaduna State Governor, Nasir El-Rufai don talk say him administration no go give ransom to kidnappers. This tin wen he talk so dey for one statement wen the Special Adviser to the governor on top Media and Communication, Muyiwa Adekeye drop on Tuesday. Meanwhile, bandits kpuff two students for one private kians, Greenfield University, for Kaduna on Monday, and dis one happen some days after dem delete three of those kind of students.
Demolition exercise don Start for Uvwie
Pay loader plus Personnel wen Uvwie taskforce on environment and traffic control collabo with the Delta State Taskforce on Environment arrange bring down illegal bill boards and attachee dem wen dey for along the Effurrun roundabout, DSC roundabout and PTI junction on Monday. Na Uvwie Local Government Taskforce Chairmo Isaac Itobi, and the Delta State Taskforce Chairmo on Environment, Evangelist Sylvester Oromoni nia coordinate d demolition exercise. Chairmo of Uvwie Local Government Area Hon. Ramson Onoyake wen still stand by to supervise the exercise come give assurance say dem go monitor d matter well well so dat people no go begin rearrange all these things wen dem don scatter say him administration don senior up d more to make sure say illegal structures no dey for d whole of Uvwie. Chairmo of the State Taskforce on Environment, Evangelist Sylvester Oromoni, wen yarn wit news people come talk say d tin wen some owners of the structures wen dem don destroy dey talk say dem no get notice before d destruction no be true becos according to am, he say dem give enof information before d destruction take place. Meanwhile, the lawmaker wen dey represent Uvwie for the state house of assembly Hon Solomon Ighrakpata come tell people wen dey long side for d area say make dem support the effort so dat d LGA go dey free from dirty and all those plenty attachee dem wen dey make d area dey worwor.