The ADC to Edo State Governor, Godwin Obaseki, for ceremonial police uniform, and one female para-military officer wen still dey on uniform collapse on Thursday for the Samuel Ogbemudia Stadium, Benin, during the second-term inauguration of the governor and him deputy, Philip Shaibu, and dis one so come cause better commotion. Na the para-military officer nia first collapsed, but dem sharp sharp revive her while the ADC come slump when Obaseki dey half way as he dey read him seven-page inauguration speech. Edo state Commissioner for Health, Dr. Patrick Okundia, and some operatives of the Department of State Services (DSS) sha later revive the ADC
FG: Plan to pay boko haram members money na fake news
The federal government don talk say dem no dey plan to begin dey pay boko haram members wen don repent N150,000 monthly. Na Bashir Ahmed wen be the Personal Assistant to President Muhammadu Buhari on Digital & New Media nia yarn dis one for twitter wen he dey respond to d rumor wen dey play say the federal government dey plan to pay dis money. He come talk say the gist wen dey town concerning dis matter na fake.
Before before Ghana Presido, Jerry Rawlings don kpai
Corona virus don kpuff before before Presido of Ghana, Jerry Rawlings at the age of 73 and dis one na according to different reports wen show from Ghanaian media. The one dey happen less than one month after Rawlings bury him mumsi. Rawlings wen be one of the African leaders wen people dey respect well well first be military leader for Ghana before he come later become politician when rule the country from 1981 go reach 2001.
Area burn suspected robbers for Uvwie LGA
Some people wen no get joy burn two suspected armed robbers on Wednesday for Refinery Junction, Effurun-Sapele Road for the Uvwie Local Government Area of Delta State. People wen dey around wen the matter play say one other suspect manage escape. According to the reports, the suspects at first shoot one teacher wen dey work with Army Day Secondary School, Effurun, before dem snatch her handbag wen contain about N200,000 and dem come still shoot another man for lap wen doctors don refer go oghara teaching hospital.
UNIBEN don postpone deir postume screening
The University of Benin (UNIBEN) don postpone their Post-UTME (PUTME) admission screening go Dec. 2. Na Dr. Benedicta Ehanire wen be the Public Relations Officer of UNIBEN nia drop dis tatafo for one statement on Wednesday for Benin. Meanwhile, the Screening Exercise for 2020/2021 suppose take place from Nov. 23rd, to Dec. 8, 2020.
Missing gbola: Benue state don put curfew over the mata
Caleb Ana, Chairmo of Guma Local Government Area of Benue State don put 12-hour curfew for Daudu community after some days of gidi gidi becos of the allegations of gbola wen dey carry dey miss for the state. Young men for Daudu town complain last week say the rate at which their gbola take dey miss no be here. Dem come talk say na some members of the community nai dey responsible for their missing microphones. Wen Ana come dey yarn wit news people for Makurdi on Wednesday, he come talk say the curfew go be between 8:00pm to 6:00am daily until the security situation improve and until everything return back to normal.
No plan to stop former governors pension-Okowa
Governor Ifeanyi Okowa don talk say him administration no get plan to stop pensions of past governors and their deputies. Okowa when yarn this one on Wednesday for Asaba, come talk say him colleague for Lagos State, Babajide Sanwo-Olu, fit get reasons why he choose to stop to dey pay dem. Den concerning the approval wen dem give Zamfara State Government for d federal government to dey manage their resources, Okowa come talk say the South-South governors go meet with Ibrahim Gambari, the Chief of Staff to President Mohammadu Buhari, to address the issue.
Central Bank don oppose suit to remove Arabic writing from naira notes
The Central Bank of Nigeria (CBN) don oppose one suit wen dey before the federal high court for Lagos wen dey seek to remove Ajami (Arabic) writings wen dey for the naira notes. The apex bank make the submission for one counter-affidavit to one suit wen Malcolm Omirhobo, one Lagos-based lawyer file before Mohammed Liman, the presiding judge over the case. CBN clear the court say e go cost plenty money to remove all those stuffs from d notes and den print new ones without Ajami. D apex bank come still talk say Ajami no be symbol or mark of Islam, but say na write up wen dey help people wen no dey speak English but dey understand Ajami fit understand am.
UN deputy seceto don encourage Naija women to enter leadership positions
United Nations Deputy Secretary General Amina Mohammed don call for all round effort to take strengthen Naija unity. Wen Mohammed dey yarn on Tuesday for Abuja, she come talk say need dey to address the recent issues wen don affect the nation bad bad. She come tell women for Naija say make dem hustle for leadership positions say she believe say woman go fit become the president of the country.
Lagos state: Sanwo-olu don submit bill to remove former governors pension
Babajide Sanwo-Olu, the governor of Lagos state, don submit one bill give the state house of assembly to end the payment of pension to former governors. The bill dey seek to cancel pension payments and entitlements to before before governors and their deputies. According to Sanwo-Olu, this move so go help to reduce the money wen government dey spend.