Alhaji Lai Mohammed wen be d minister of information don talk say the opposition dey play dirty politics with the new electricity bill and d increment for petrol price. Wen Mohammed dey yarn for one press conference on Monday for Abuja, he come talk say subsidising petrol no go fit work again becos of d way wen things be now for the economy. He come talk say petrol price for Naija nia be still the lowest for West Africa with N162/ litre, say Ghana dey sell petrol for N322, Benin Republic dey sell for N359 den Togo come dey sell for N300 per litre.
Akon dey build him own city “Akon City” for Senegal
Akon, d Senegalese musician wen still be American don reveal plans of E own city wen he call “Akon city”. This city go be like “Wakanda” for the movie “Black Panther”. The city go get steady electricity as na solar power e go use 24/7. The city go get e own currency, the Akoin, a cryptocurrency and na Senegal this city go dey. Meanwhile, the Senegalese government don dash am 2000 acres of land for this project and Akon alongside the Senegalese minister of tourism, Alioune Sarr don lay the first stone for the city. According to Akon, the setting for this city go different, e go get seven areas: education district, health and safety area, senewood area, residential and office area, technology area, African culture village area and entertainment area. The education area go get three major building for schools. These schools na Harvard, MIT, Stanford and Berkeley. House go dey for the students and the school staffs. The health and safety area go contain hospital, laboratory and pharmacy. E go still get police and fire station wen go contain place wen pesin fit train. The senewood district go get towers like Akon tower and media tower. E go still get four film and record studios. The office and residential area go contain two office building and six residential building. Also this area go get “smart parking system”. Electronic transportation nai dem go use for this city. The technology area go get tech park wen carry many buildings. The African culture village area go get seaside resort, restaurant, night club, hotel, open market and fitness center. The entertainment area go contain casino, stadium, mall with cinema and fashion area. The Musician Akon don talk say the project go swallow $6 billion and him don get $4 billion already from investors. He say the construction go start early next year with the mind say by 2029 e don finish building and them don dey use the akoin cryptocurrency. Based on Akon yarnins, the akoin no be like normal cryptocurrency wen dey depend on stable currencies. The akoin dey use cellphone minutes,e dey depend on smartphone usage. He con talk say the akoin go help people control their own money and give them chance to make better decision concerning money without their country hand inside.
Federal government don tell schools to prepare to open
The federal government don tell school administrators say make dem start to dey prepare for the full reopening of schools. Na Sani Aliyu wen be d national coordinator of the presidential task force (PTF) on COVID-19 nia give the directive for the presidential task force PTF briefing on Thursday. Aliyu, when direct them to carry out risk assessment come talk say dem go run the reopening for phases.
TUC don cut rope becos of light bill and petrol wen government increase
The Trade Union Congress of Nigeria TUC don condemn the increment of petrol price and electricity bill for the country. Yesterday, the TUC for inside one statement wen their presido Quadri Olaleye, and Secretary-General, Musa-Lawal Ozigi sign, dem say dem dey disappointed with d development. Dem come accuse the government say dem don lost touch with Nigerians
NSE suspend trading for six companies
The Nigerian Stock Exchange (NSE) don suspend trading for six companies becos dem no file their audited financial statement for the year wen end on December 31, 2019. The NSE say dem make the move becos the companies no gree obey d corporate governance rules wen say dem must submit financial statements within a particular period. For one notice wen dem send give investors, the NSE say the companies wen dem suspend nia be FTN Cocoa Processors Plc, Medview Airline Plc, Niger Insurance Plc, R.T. Briscoe (Nigeria) Plc, Union Dicon Salt Plc and Capital Oil Plc.
Delta State government don approve construction of the Ogheye ultra modern market-Charles Aniagwu
The Delta State Executive Council don approve the sum of N4 billion for the construction of Ogheye Ultra Modern Concrete Floating Market project. Na d commissioner for Information for the state, Mr. Charles Aniagwu nia drop dis informate for one post-Exco press briefing wen shele yesterday for Asaba wen be d state capital. According to am, the market dey very big and he say e go need more than N4 billion to complete.
PPMC don increase petrol price
The Petroleum Products Marketing Company (PPMC) don increase the ex-depot price of petrol from N138.62 to N151.56 per litre. The ex-depot price nia be the price wen dem take dey sell d product dey give marketers. Meanwhile na the PPMC, when be one branch of the Nigerian National Petroleum Corporation (NNPC) nia announce the new price for one memo wen dem send give industry stakeholders.
Arsenal don sign Gabriel Magalhaes
Arsenal don confirm the signing of Gabriel Magalhaes from Lille. The defender ball enter d club for one £25 million deal and he don sign five-year contract with the Gunners. Meanwhile, he don become the club second signing of the transfer window, based on say dem don first kpake Brazilian player Willian on top free transfer from Chelsea.
We no produce much crude becos of maintenance work-NNPC
For 13 months, the three refineries for Naija cost the country ₦148 billion for expenses, but dem produce less than 40,000 metric tonnes of crude oil, and dis one na according to the June report wen the Nigerian National Petroleum Corporation NNPC publish. The NNPC say dem no produce much crude becos of d maintenance work wen dey go on for the oil refineries. NNPC for their audit report wen dem publish for d month of June show say the refineries post total loss of ₦1.64 trillion from 2014 to 2018.
No Senator receive #20 million as COVID-19 palliative-Sen. Ajibola Basiru
Ajibola Basiru wen be talk talk person for the senate don yarn say no senator receive N20 million as COVID-19 palliative. Basiru talk dis one wen he dey react to one statement wen Cairo Ojougboh, executive director of projects for the Niger Delta Development Commission (NDDC) make. Ojougboh say senators and members of the House of Representatives get N20 million and N15 million respectively as COVID-19 relief money. But for one statement wen Basiru drop yesterday, he say make Ojougboh provide evidence to take back wetin he talk otherwise make he clean him mouth well. Meanwhile senate don talk say dem go fit go court based on d accusations wen dey against the national assembly.