The Abuja Division of the Federal High Court don order the Department of State Service, DSS, to sharp sharp release the leader of #RevolutionNow protest, Omoyele Sowore wen dey with dem. For one ruling wen trial Justice Taiwo Taiwo deliver today, the court say the previous order wen dem issue for the security agency to hold Sowore for 45 days don finish. Justice Taiwo say the court strike out d application wen d DSS file again to renew the detention order after dem withdraw am and so for that reason, warrant no come dey again wen dem go use take continue to dey hold Sowore.
Messi don win FIFA world best
FIFA don name Lionel Messi, as d best male footballer of the year. Them announce d 32-year-old as the winner for one ceremony yesterday and na so he beat him highest competitor Cristiano Ronaldo and Virgil van Dijk, when UEFA recently name player of the year. Based on say Messi miss the cut last season, na 36 league goals nia he score to take kpake the 2019 gong.
Join hands with Okowa
The candidate of the All Progressive Congress, APC for the 2019 Delta State Governorship elections, Chief Great Ogboru don receive advise to join hands with Dr. Ifeanyi Okowa led PDP administration so dat dem go fit build a stronger Delta. Na the Senior Political Adviser to the Governor, Fukekeme Solomon nia give the advise just after the tribunal judgment wen say na Governor Okowa and him Deputy, Deacon Kingsley Otuaro nia win for the Delta State Election Petition Tribunal for Asaba. But the state publicity seceto of the APC, Barr. Sylvester Imonima don talk say d party go fire down go d appeal court and say dem go use all the legal procedures take reclaim their stolen mandate.
Corrupt officials make ona step down
Before before Minister of Sports and Youth Development wey dey call Solomon Dalung, don tell officials of the Nigeria Football Federation wey get corruption matter make them step down. Dalung yarn this one for interview after the meeting between the minister of youth and sport Sunday Dare and the NFF officials. The football federation of Nigeria (NFF) don dey go true one kin investigation by the Economic and Financial Crime Corrupt Practices and other related offences Commission (E.F.C.C)
Tomori fit play for super eagles
Chelsea defender, FikayoTomori don talk say he fit play for the Super Eagles. The 21-year old, yan am based on say he parents come from Nigeria, and him be citizen of Canada and England. According to the sabi Chelsea defender, he never chose to play for England, Canada ,or Nigeria but if any of them give am call up, he go rotate enter their squad Tomori, don become important part of the Chelsea young squad this season. He be net one make sense goal against nowrich city for the epl and frank Lampard don depend on am for the defense. The Nigeria football federation (NFF) don the try to carry him team mate Tammy Abraham come super eagles but with wetin Oluwafikayomi Oluwadamilola “Fikayo” Tomor don talk, dem go try convince am also make come play for the super eagles.
Premier League Weekend Update
Liverpool beat Chelsea 2-1 and like dis the Premier League leaders don dey use five points take dey lead for top of d table. Na Alexander-Arnold make sense free-kick nia open the scoring for Stamford Bridge. Roberto Firmino come increase Liverpool advantage with another goal before N’Golo Kante come drop one for Chelsea for second half wen come make d game end for 2-1. MEANWHILE 10 man Arsenal come from back knack Aston Villa 3-2 for Emirate stadium
Okowa dey beg FG to soji roads
Governor Ifeanyi Okowa don tell the Federal Government to re-soji all d roads wen dem construct more than 20 years back so dat dem go fit reconstruct d ones wen don maga. Na wen d governor dey skemp d ongoing work for portions of Warri-Benin highway wen the state government dey reconstruct nia he for take talk dis one. Governor come talk say na becos many federal roads for across the country don old nia make all these bad road palava dey play, he come say make d Federal Government really take time soji those kind roads and say make dey answer answer sharp sharp.
Yam carry person go prison
One Magistrate court wey dey Minna, Niger State don sentence person on the 20th of September, 2019 go prison. The person wey dey sentence na Abdullahi(25 years old). Mr Abdullahi steal eight tubers of yam from one police officer farm. When dem carry Mr Abdullahi go court na once him plead guilty con beg say make dem show am mercy. The Magistrate of the court Binta Rijau sentence am base on Nigeria Constitution but con give am condition to pay a fine of three thousand naira.
Over 1 billion naira don go for cinema
News Agency of Nigeria (NAN) don report say Nigerians spend over 1, 294, 602, 827 billion naira just to watch movies inside cinemas for July and August. NAN get the amount through the data wey cinemas provide. Some of the movies wey generate the money na: Bling Lagosians Mokalik Avengers: Endgame Spiderman Lion King Rant Queens The Gift Fast and Furious: Hobbs and Shaw Angel Has Fallen Once Upon a Time in Hollywood
Naija Senators Don Begin Provoke
The Senate Leader, Yahaya Abdullahi don talk say all those people wen deyblast d Senate becos dem dey budget N5,550 billion to take buy SUVs no know where dey pain dem. Wen Abdullahi dey yarn wit news people for Abuja yesterday, he come talk say Nigerian senators deserve SUVs and say no be bad thing at all at all. The lawmaker come talk say each of the 109 senators for the upper chamber go get one SUV each, wen dem go pay for by the end of their four-year legislative tenure.