The Minister of State of Petroleum Resources, Timipre Sylva don talk say dem go pass d Petroleum Industry Bill (PIB) wen currently dey before the National Assembly for d month of April. Mr Sylva yarn dis one on Thursday wen he dey clear State House correspondents scores for the Presidential Villa, Abuja. He come talk say the bill don already pass second reading for the two chambers of the National Assembly.
NNPC no go fit carry subsidy load
Mele Kyari wen be d general managing director (GMD) of the Nigerian National Petroleum Corporation (NNPC) don talk say the company no go fit continue to bear the subsidy load. You go remember say the Petroleum Products Pricing Regulatory Agency (PPPRA) release one template wen dem take increase petrol price go N212 per litre — but them come later delete d template. Wen Kyari come dey yarn during one ministerial briefing on Thursday for the Presidential Villa, Abuja, he come talk say d NNPC no go fit dey carry d load of underpriced sales of petrol again and say d market price wen dem need to implement.
State go take the osusu- Okowa
Governor Dr. Ifeanyi Okowa don finally yarn concerning the £4.2M wen Ibori gbanskele go shock-in put for obodo oyibo wen dem don return. The governor come talk say he get d believe say the state go take possession of the osusu. Wen Okowa come dey yarn during one interview on Wednesday, he come talk say the state go use every diplomatic channel take settle the matter. He come still talk say d people of d state go benefit wella from the pepper if dem use am take tidy some projects wen dem suggest for Delta State.
No let fear do you, we dey- Irabor
Lucky Irabor wen be d chief of defence staff don tell Nigerians say make dem no let odidi hold dem say the military dey make serious efforts to make sure peace dey for the country. Irabor give the assurance on Monday, when he yarn for Abuja for one security summit wen dem title “Promoting Kinetic Operations as a Major Plank for Counter Terrorism and Counter Insurgency in Nigeria”. According to am, the armed forces of Nigeria dey committed to make sure say peace return to different parts of the country.
NCDC go arrest people with fake Covid-19 test result
The Nigeria Centre for Disease Control (NCDC) don talk say dem go arrest and deal wit any traveler wen dem see wit fake coronavirus test results. Wen Chikwe Ihekweazu, NCDC director-general dey yarn during the media briefing of the presidential task force (PTF) on COVID-19 on Monday, he come talk say dem don launch one platform to take dey confirm results. Ihekweazu come talk say from now on, airlines, embassies and countries go dey verify tests wen private laboratories tidy for travel purposes.
FA cup: Chelsea go jam Man U
Eight-time winners Chelsea go play Manchester City wen dey hustle for four trophies for the FA Cup semi-finals. Chelsea wen Arsenal beat for last year final, kpons Sheffield United 2 kondo on Sunday to reach the last four. While Leicester City go jam wit Southampton for the other tie, their matches go take place for Wembley on 17 and 18 April.
Naija piple gbege power companies on top meter distribution parol
Nigerians don cut rope follow Power distribution companies o say dem dey sell the free meters wen d federal government provide for electricity users. For October 2020, the Federal Government inaugurate the National Mass Metering Programme wen the Central Bank of Nigeria take give one framework for financing the scheme. Wen d National Seceto for d Nigeria Electricity Consumer Advocacy Network, Uket Obonga come dey yarn concerning d studies wen him group don tidy, he come talk say Discos dey hail meters wen suppose be free.
Take original Astrazeneca-NAFDAC
The National Agency for Food,Drug Administration and Control (NAFDAC), don advise Nigerians to make sure say the Astrazeneca vaccine wen dem dey take get d original label. The thing wen NAFDAC talk so dey for inside one statement wen the agency Director General, Mojisola Adeyeye sign on Sunday, for Abuja. The agency come talk say dem dey give the warning so dat people no go go collect fake Astrazeneca vaccine.
Herder’s nai attack me-Samuel Ortom
…. we no support Ortom attack-NGF …. IGP don order police to investigate the mata …. we no go release land for open grazing-Ortom The Northern Governors Forum,NGF don talk say dem no support d the attack wen bad guys attack the convoy of Samuel Ortom, d governor of Benue state. Wen Simon Lalong, chairmo of the forum and governor of Plateau state dey yarn on top d matter, he come talk say the matter get d way e be say dem need to do thorough investigation on top d matter. The matter na say some bad guys attack Ortom convoy on Saturday for Tyo-Mu community near Makurdi. Whereas on top dis same matter, Mohammed Adamu wen be d inspector-general of police (IGP) don order investigation concerning the attack wen bad guys attack the convoy of Samuel Ortom, d governor of Benue state. Wen Orton dey talk wetin really happen, he come talk say d guys wen carry fash wen attack am na “herders”, say na him security aides wen stand fit nia chase dem. Then wen Frank Mba, talk talk person of the Nigeria police force dey voice for inside one statement on Sunday, he come talk say the inspector-general of police don direct the commissioner of police for the state to do enof torchlighting concerning d attack. Meanwhile, the governor wen raport wit news people after the attack dis past weekend, he come talk say he go continue to stop fulani bandits from operating inside Benue, say he no go give up. He come still talk say the state no go lia lia release any land for herdsmen to take dey train their nama nama.
States no dey cooperate with the FG ontop security matas-IGP
The Inspector-General of Police Mohammed Adamu don accuse states say dem no dey fully dey cooperate with the Federal Government for dis gbege against insecurity. Adamu when yarn during the third Quarterly Meeting of Secretaries to State Governments (SSGs) for Abuja come dey call for “community participation” through the involvement of traditional rulers to help secure the country from all forms of criminality. According to him, security no be something wen dem suppose leave for security agents alone to handle.