The Nigerian Army don talk say dem no go let area know the names of their men wen go Lekki tollgate on October 20, 2020. You go remember say soldiers go pursue #EndSARS protesters wen make am hard for motor to move for along that area for two weeks. Den for one interview, Osoba Olaniyi, talk talk person of the 81 division of the Nigerian Army come talk say e no dey professional for the army to release d names of the soldiers wen take part for action on that particular day.

The Senate don talk say the statement wen the Minister of Works and Housing, Mr. Babatunde Fashola (SAN) yarn concerning the way wen Nigerian roads dey na serious error. According to the red chamber, Fashola say na the National Assembly members nai Nigerians go hold responsible for the federal roads wen don caput for Benue State. But wen the upper chamber come dey yarn for one statement, dem come accuse the Minister say he dey try to set up members of the public against the federal lawmakers.

Nor do nor do, 250 workers for Television Continental (TVC) for Ikosi, Ketu, Lagos State nai don dey jobless after jaguda burn the station. The Chief Executive Officer for the station, Mr. Andrew Hanlon come talk say na more than 500 direct employees of the station nai dey struggle to work for the place wen the company just arrange for dem for the mean time. Hanlon wen yarn dis one on Thursday when the state Governor, Mr. Babajide Sanwo-Olu visit the management and staff of the station, come talk say some bad guys attack the station after the #EndSARS protest come turn something else.

The Nigerian armed forces don launch one major nationwide operation to take cramp all ole people and jaguda dem even as okamuka continue to dey play for across the country. The operation when the Nigerian Defence headquarters order go push one major group of military formations to go end all d wahala wen criminals dey cause even as dem dey tiff both public and private assets for the country. For the operation, the military command come give order to cancel all leave and passes for their personnel. Meanwhile reports wen dey reach us come still talk say dem no go give new leave while the operation dey on and den dem don order all their personnel wen dey on leave to resume “with immediate effect.”  

The Deputy Senate Presido, Ovie Omo-Agege don beg members of the Niger Delta Avengers say make dem stop the plan wen dem get to attack oil facilities for the region. According to one statement wen Omo-Agege media office drop on Wednesday, the deputy presido talk dis one becos of the way wen nine mili mili group for the Niger-Delta region take dey threaten say dem go scatter things. He come talk say if dem fire down wit their plan nia be say d economy go suffer plus say e go cause additional environmental wahala for the area.

The Judicial Panel of Enquiry and Restitution for people wen SARS abuse for Lagos start work yesterday with one of the petitioners wen begin explain wetin he don pass thru for Police hand. Okolieagu Obunike, wen get five children clear the panel say for the year 2012, the Federal Special Anti-Robbery Squad (FSARS) operatives arrest am and na so dem come torture am for 47 days for their Ikeja office, without trial. Obunike say the operatives still tiff and hail him motor, one Volkswagen bus, land, bags of cement, inverter and say na so den still move wit everything wen dey for him bonk. Meanwhile, Okoli Agwu wen be another victim of police brutality, don talk operatives of the special anti-robbery squad (SARS) remove him teeth during the 48 days wen he spend wit dem.