The Christian Association of Nigeria CAN don talk say dem no support the proposed social media and hate speech bills say becos na plan to silence Nigerians. This informate dey for one statement wen the National Director, Legal and Public Affairs, CAN, Evang. Samuel Kwamkur drop yesterday for Abuja. The association come say make the National Assembly drop the bills and den focus on legislation wen go address insecurity and the general welfare of the people.

Telecommunications companies don talk say them go fit stop to dey offer Unstructured Supplementary Service Data (USSD) services dey give financial institutions for free. The companies wen dey under the Association of Licensed Telecommunications Operators of Nigeria (ALTON), say banks go get to dey pay for the service if them wan continue to dey receive am. Gbenga Adebayo wen be ALTON chairmo come clear news people for Lagos say network operators dey lose big big money everyday for the services wen dem dey provide.

President Muhammadu Buhari don send request give the senate again say make dem approve the federal government 2016-2018 external borrowing plan. Oga presido first send the loan request originally wen dey estimated at $29.960 billion for 2016, but the senate under the leadership of Bukola Saraki bounce am. But for the new request wen d senate presido Ahmed Lawan read during their meeting yesterday, Buhari say make the lawmakers approve the loan when he say dey very important as far as the delivery of the government policies and programmes dey concerned Meanwhile President Buhari don direct ministries, departments and agencies (MDAs) to obey the ongoing change of all government operations to digital platforms. Wen Femi Adesina, presidential spokesman dey yarn for one statement, he come talk say oga Buhari give the order yesterday for d opening ceremony of the e-NIGERIA 2019 conference on the Nigerian digital economy wen shele for the International Conference Centre (ICC), Abuja. He come talk say the change go help to increase efficiency and effectiveness for service delivery.

The Senate don order their committee on Niger Delta to work with the newly approved board when dem dey reason the 2019 and 2020 budget of the Niger Delta Development Commission NDDC and say no be the committee wen the Minister of Niger Delta Affairs, Godswill Akpabio arrange for now. Na the Senate Presido Ahmad Lawan nia give the order during their yesterday meeting. Wen talk talk person for d Senate Godiya Akwashiki dey talk, he come talk say the Senate don do their part wit d way wen dem take confirm the nominees, but las las he come talk say he hope say the president go inaugurate the board soon.

When policemen dey pursue members of the Islamic Movement in Nigeria (IMN ) wen dey protest for Wuse market for Abuja, na so bullet come touch one secondary school student. The girl been dey return from Government Secondary School, Wuse when she run enter the olokpa dem as dem dey chase the crowd. Meanwhile, d olokpa dem come arrest two news people wen been dey cover wetin dey happen.

Protesters burst enter the National Assembly Complex for Abuja yesterday becos dem dey binu concerning the bills wen dey seek to regulate social media and end “hate speech” for the country. The protesters wen dey made up of individuals and civil society organisations, display different cardboard papers where dem for take dey ask the legislature to fashi the bills.

Before before Presido Olusegun Obasanjo don tell Benin Republic wen be Naija neighbour say make dem change their ways so dat d relationship between the two countries go gel well. Na wen Obasanjo dey yarn for one press conference for Addis Ababa based on the policy dialogue of African business associations on implementing the African Continental Free Trade Area (AfCFTA) Agreement nia he for take talk dis one. He come talk say d way wen Benin take dey behave unto say dem dey sabi cheat person dey feel like say na dem be wiser no good, he come talk say Naija don dey bear dis their character for a very long time.