Sack Pantami- Ndudi Elumelu We no discuss Pantami matter for FEC-Lai Mohammad Ndudi Elumelu, minority leader of the House of Representatives, don call for the immediate sacking of Isa Pantami, d minister of communications and digital economy. Elumelu tell President Muhammadu Buhari to sack the minister becos of him views wen show say he dey support terror groups like Al-Qaeda and Taliban. Wen Elumelu come dey move one point of order during their yesterday meeting, he come talk say dem suppose sack d minister after he prove say he support these bad people for the past. Meanwhile, for the Federal Executive Council meeting wen hold on Wednesday, dem no soji all d plenty matter wen surround the Minister of Communications and Digital Economy, Isa Pantami becos of d recent comment wen he make be concerning Al-Qaeda. The FEC hold their 42nd online meeting on Wednesday wen President Muhammadu Buhari take charge of for the presidential villa, Abuja and Pantami attend d meeting. Wen Lai Mohammed, d minister on top informate and culture come dey answer question as per if dem reason the issue wen Pantami for take support Al-Qaeda views, he come talk say d matter no come up for discussion.
House of Reps don condemn high acceptance fees for higher institutions
The House of Representatives don condemn the high acceptance fees wen Nigerian universities, polytechnics, and other tertiary institutions dey put on people wen dey find admission. Chairmo of the House Committee on Basic Education, Prof Julius Ihonvbere, wen yarn for their meeting on Wednesday, come move one motion to know why these kians dem dey collect all these big big money. Las las, the House come settle say dem go soji the matter.
UK plan to give IPOB asylum dey spoil Naija fight against terrorism-FG
The federal government don talk say the plan of the UK to give asylum to “persecuted” members of the Indigenous People of Biafra (IPOB) dey belittle Naija security. This statement show based on recent report wen dey play say the UK Visas and Immigration (UKVI) don release new guidelines on how to treat asylum applications from members of d Biafran groups wen d government don ban. For the guidelines, dem go give asylum to “persecuted” members of the IPOB and the Movement for the Actualisation of the Sovereign State of Biafra (MASSOB). Wen Lai Mohammed, d minister of information and culture come dey talk concerning d matter on Tuesday, he come talk say the decision dey spoil their gbege against terrorism. Mohammed come talk say the decision no dey acceptable and say e dey disrespectful to Naija.
Pantami need to resign-Wike
…say make local government chairmo do well Governor of Rivers State, Nyesom Wike don talk say the Minister of Communications and Digital Economy, Dr Isa Pantami need to resign from office, whether or not say he make one recent statement wen he for take dey support terrorist groups. Wike yarn dis one during one interview wen he get for Port Harcourt, the Rivers State capital on Tuesday. According to am, the minister suppose resign immediately the information about him support for these bad guys become public matter.” He come talk say everybody know say the federal government wen the All Progressives Congress (APC) dey lead dey sabi protect people wen get bad characters. Meanwhile Governor Wike don tell all those local government chairmo dem and councillors wen no dey work for River state to sit up. Wen Wike dey voice during one meeting wen he get with the local government chairmen for the state house on Tuesday, he come still blast council bosses and councillors when dey abandon their areas dey operate from other areas.
Petrol price go increase for May- Mele Kyari
Mele Kyari, d general managing director of the Nigerian National Petroleum Corporation (NNPC) don talk say the market price of petrol no go increase for d month of May becos talks dey go on between stakeholders. Wen Kyari dey yarn wit news people after he don visit President Muhammadu Buhari for the State House for Abuja on Tuesday, he come talk say the federal government dey discuss with ogbonge stakeholders wen go determine the price of petrol. He come talk say the NNPC talk wetin dem talk of recent about d price of petrol after dem realize say dem no go fit conclude d talks wen dey go on for d month of May.
Senate ask FG to make policy wen go support local cement production
The Senate don tell the Federal Government to introduce easy policies like the provision of industrial and larger tax packages to encourage local investments for cement production for Naija. The senators yarn dis one on Tuesday after dem don reason one bill on the ‘Need for Liberalization of Cement policy in Nigeria,’ and na Senator Lola Ashiru nia sponsor d bill. The upper chamber come talk say if d federal government do dis one, apart from say e go attract local investors, dem say e go still help to increase the production of cement and also reduce d price of d product for the market.
No amount of land worth any Deltan blood- Gov. Okowa
Governor Ifeanyi Okowa, on Tuesday tell communities say make dem no dey do gra gra especially becos of matter wen dey associated with land ownership, say becos no amount of land dey worth the blood of any Deltan. Okowa give the advice for Asaba when he dey receive the report of the Judicial Commission of Enquiry as regards the Boundary gbege wen dey play between Ozoro and Oleh communities for Isoko North and Isoko South Local Government Areas. The governor come give assurance say dem go process the commission report with d view to raise White Paper wen go settle the boundary palava wen dey play between these two communities kpata kpata.
Ofobrukueta promise to fight illegal people wen dey collect deve
The Chairmo of Ethiope East Local Government, Hon Victor Ofobrukueta don promise to tackle the rate at which illegal agents take dey over collect money from private investors for the Council Area, say he dey ready to partner with different groups in order to better the lives of him people. Hon Ofobrukueta make this promise for him office for Isiokolo wen he dey host the Executive of Pharmaceutical Society of Nigeria, Delta State Chapter. The council wen talk say health na wealth, come promise to rearrange the health sector for Ethiope East LGA for better service delivery, he say he go do dis one by engaging qualified pharmacists for each of the Health Centres for the Area as soon as the osusu wen dey enter nwanwa improve. He come still promise to rub mind with other Council Chairmo to tackle the way wen illegal agents take dey over collect from Pharmacists and other investors. Before now, the Delta State Chairmo of d Pharmaceutical Society of Nigeria, Mr Kenneth Otene, congratulate Hon Victor Ofobrukueta as he take win him election den he come promise to work with am to promote good health to d people wen dey long side for the Council Area.
Attahiru clear House of Reps on weapon mata
Based on d concerns wen dey about weapons wen the Nigerian army buy, d Chief of Army Staff Lt General Attahiru Ibrahim don clear the House of Representatives say na some specific people nia buy d the weapons. Wen Attahiru dey yarn wen he mark present before the house Adhoc committee on Arms, he come talk say d green chamber need to invite the people wen dey involved. But the lawmakers say dem no agree wit wetin the Chief of Staff talk, say dem dey follow the command structure of the Nigerian army.
El-Rufai get soft heart- Pastor Adeboye
Enoch Adeboye, wen be general overseer of the Redeemed Christian Church of God (RCCG), don talk say Nasir El-Rufai, Kaduna state governor, na man wen get soft heart. The pastor yarn dis one on Tuesday when he visit the Kaduna governor for the state government house, he come talk say God go fight for am to overcome the challenges of banditry and kidnapping wen dey play for Kaduna. The visit so happen after dem release eight RCCG members when bad guys kidnap for d month of March.