For the eighth day back to back, the Nigeria Centre for Disease Control (NCDC) confirm more than 1,000 new cases for their daily count of coronavirus infections. The NCDC confirm 1,244 new positive samples for across 17 states and the federal capital territory (FCT) for their update for January 11, 2021. Like dis, na more than 16,000 infections nia dem don record now within the last two weeks.
Nothern politicians dey fear restructuring- Pat Utomi
Pat Utomi, one professor of political economy don talk say some politicians for the north dey fear dis restructuring matter because dem no dey sure about where e go lead them. Wen Utomi dey yarn for one online media meeting ahead of the ‘Never Again’ conference to take mark 51 years after the civil war, he come talk say the north dey largely dey rely on the federal government for their share of revenue, when he say don make them no dey really dey produce. He come talk say dis restructuring go help them “become productive and den move away from the poverty status”.
Edo State: Man abandons family at POS shop
Reports wen dey reach us na say one middle-aged man wen him name na David don abandon him wife and three children for one POS shop, after he collect N43,000 from the operator. This matter so play for Oluku, near Benin City, the Edo state capital. According to d tatafo, the man forward march go the POS shop with him wifey and three pikins, give him ATM card to the shenkes wen dey operate d machine, he come talk say na N43,000 nia he wan withdraw. After d babe don try plenty times to withdraw d money and e fail, d man come tell her to give am the money, while him family and the attendant continue to dey try the withdrawal as he seriously need to solve one matter with the money. After dem don wait tire without seeing d brake light of d man, the POS attendant come report the matter for the Ekiadolor Police Division, where them take currently hold d woman and her three pikins.
We fit announce new resumption date- Adamu Adamu
The Federal Ministry of Education don talk say the Jan.18, 2021 date for schools to resume no dey sure and so dem go fit announce new date depending on the nation COVID-19 indicators. Na the Minister of Education, Mr. Adamu Adamu nia give the hint on Monday for Abuja for the joint national briefing of the Presidential Task Force (PTF) on COVID-19. You go remember say the News Agency of Nigeria (NAN) report say the PTF for December 2020, order schools for the country to remain closed until Jan. 18, 2021.
We don Checkmate Boko Haram- Army
The Defence headquarters (DHQ) say the armed forces don ”checkmate” Boko Haram and their operations for the north-east. Undermining their claims say dem don finish d badoo dem, some parts of the North-eastern region still dey face attack. But during one interview with d News Agency of Nigeria (NAN) on Monday, John Enenche, Coordinator of Defence media operations come talk say the Federal Government and the military since 2015 don check the weight of terrorist activities for across the country — particularly for the north-east. Meanwhile, Chief of Army Staff, Tukur Buratai don talk say the Nigerian Army go use their church mind for their recruitment processes to make sure say na only qualified people nia dem recruit. Gen. Buratai make the statement during the final screening for 80 regular recruits for Falgore forest training camp on Monday for Kano State. He come talk say the exercise na new approach to the screening and recruitment process of the Nigerian Army. He say dem dey do dis one becos dem need to recruit the best.
ASUU: School never dey safe to reopen
Based on d way wen corona virus cases take dey increase for the country, Branches of the Academic Staff Union of Universities ASUU don talk say the institutions no dey ready yet for safe reopening. Wen the chapters of the union dey yarn wit news people for separate interviews, dem come comment on the directive wen d National Universities Commission give say universities go fit resume on January 18, but say dem must obey all COVID-19 protocols for hostels and lecture halls. ASUU come talk say although say their members dey ready to start work, dem dey government neva put measures in place for d safe reopening of the schools.
Covid-19: Naija record 1,024 new cases
Naija reach another bad state as 1,024 people test positive for COVID-19 and dis one na according to the informate wen d Nigerian Centre for Disease Control (NCDC) drop on Sunday night. The new figure come carry the country total cases go more than 100,000. This one so dey happen about 11 months after the country record their first infection for one Italian traveler body on February 27, 2020. On Sunday, Naija report 1,024 new cases from 16 states and the Federal Capital Territory (FCT) and dis one so come push the total number of infections for the country go 100, 087.
Covid-19: Government dey plan to immunize 70 per cent of Naija
Reports wen reach us dis weekend na say Naija go fit spend around $576 million to take get COVID-19 vaccine. Director of National Primary Healthcare Development Agency (NPHDA) Dr. Faisal Shuaib come talk say the government dey plan to immunise 70 per cent of Nigerians wen dey at risk of the virus. According to am, the Global Alliance for Vaccine and Immunisation (GAVI) go make free vaccine wen dem go take immunise 20 per cent of those wen dem wan vaccinate available to the country and 91 other countries.
No dey travel for night-FRSC
The Corps Marshal of the Federal Road Safety Corps (FRSC), Boboye Oyeyemi, don advise fleet operators, commercial drivers and private vehicle say make dem no dey travel for night. Wen Mr. Oyeyemi dey yarn for one statement through the agency’ talk talk person, Bisi Kazeem on Sunday, he come dey complain about d rising cases of road accidents and d number of deaths wen dem dey record for night. The FRSC oga come talk about one serious accident wen happen for January for Kabba, Kogi State, where two motor jam each other face to face. He come talk say d accident happen becos one of the drivers dey sleep on top steering becos he don tire unto say body no be firewood.
Delta State: Court don order the arrest of fake Urhobo Monarch
The Chief Magistrate Court, Ibusa, don give bench warrant for the arrest of one Mr. Rueben Raleigh Ogode when dey face trial becos he unlawfully put and dey parade himself as Traditional Ruler within Ughievwen Kingdom and dis one dey against the Traditional Rulers, Council and Chiefs’ law of Delta State. The defendant wen dem initially charge go the Magistrate Court for Otu Jeremi before them transfer d charge to Chief Magistrate Court, Ibusa, no gree appear before the court on the return date even when him lawyer dey for Court. Also one letter wen show from the Police wen dey seek to withdraw the charge against the Defendant no see front after the court talk say d state don take over d prosecution of the charge. The judge come adjourn d case go 18th of January for more hearing.