Zainab Ahmed, d minister on top finance, don talk say owners of expensive boats and private jets go begin dey pay for luxury items that is big items as from 2019. Wen d minister dey yarn for Abuja, he come talk say dem go introduce charges for some areas while dem go come reduce taxes for small and medium enterprises. According to Ahmed, the Whistleblower Unit don recover more than N8.5 billion and $465 million among others from the 1,051 investigations wen dem fire down wit from d tips wen dem receive.

Buba Galadima, one spokesman for the Peoples Democratic Party (PDP) presidential campaign organisation don talk say Muhammadu Buhari no go be Naija presido come May 29. Na wen Galadima dey voice for one Television programme yesterday nia he for take talk dis one. The PDP campaign spokesman come talk say since Buhari don leave the signing of the electoral act amendment to new government, he say Atiku Abubakar, wen be PDP presidential candidate, go sign d bill for d year 2019.

Nothing less than 167 police officers nia gbes comot from one training ground after dem hear say dem dey receive training so dat dem go go gbege Boko Haram badoo dem. The officers wen borrow leg so wen d force don declare wanted dey amongst the 2,000 additional police officers wen d Inspector-General of police Ibrahim Idris recently draft to support the efforts of the military against d boko haram jaguda dem for d North-east. The officers no gree submit their arms, ammunition and other official equipment wen dey wit dem when them dey tule. The force been send dem go for one induction training for the Nigerian Army Special Forces Training School for Buni Yadi, Yobe State. But many of them come start to dey fly after dem find out say na Boko Haram fighters wen no get conscience nia dem go go kira wit.

The Buhari Media Organisation (BMO) don tell the People’s Democratic Party (PDP) and their Presidential campaign spokesperson, Buba Galadima say make dem get clear understanding of the laws wen dey guide campaign funding before dem make public statement on top d contribution wen people make to the campaign of President Muhammadu Buhari. The Organization blast Galadima becos according to dem, he dey ignorant and say na frustration nia dey worry am becos Nigerian farmers donate about N1.2 billion for oga Buhari campaign. For one statement wen Niyi Akinsiju and Cassidy Madueke, Chairmo and Seceto sign, d BMO say Galadima no know about d laws wen dey guide the Electoral Act.

Based on the Christmas wen dey come, the Economic and Financial Crimes Commission EFCC don launch total war on Yahoo Boys. The operation wen dem codename ‘Cyber Storm’, go involve EFCC operatives wen go dey monitor deals wen no pure especially d ones wen youths dey run and yet dem no go fit explain how dem take make their money. The commission come say dem go still push their agents go nightclubs and concerts where youths dey normally dey go “pop” expensive champagne.

To overcome the “serious revenue challenge” wen d country experience for the 2017 and 2018 budgets implementation, the federal government yesterday talk say dem don declare state of emergency on top money wen the country dey make. Na Director-General for d Budget Office of the Federation, Mr. Ben Akabueze, nia yarn dis one during one town hall meeting wen he get with Chief Executive Officer (CEOs) of enterprises (GOEs) for Abuja. Mr. Akabueze come talk say the government no get any option than to force revenue generation agencies to submit their operating surpluses put for the national account, even as dem dey make sure say stronger enforcement action dey against people wen march line on top tax matters.

Some people wen dey long side for Nasarawa state don clear Amnesty International (AI) say olokpa dem wen federal government send go their communities to go stop attacks wen suspected herdsmen dey carry out on dem tell dem to pay N150,000. The people make d complain for one report wen AI release on top the gbege wen dey play between farmers and herdsmen for the country. For the report wen dem release on Monday, the villagers say the kpokpo wen dem push from the force criminal intelligence and investigation department tell dem to pay the money for “logistics”. Meanwhile Jimoh Moshood, wen be talk talp person for d Nigeria police force don talk say nothing like dat.