The Christian Association of Nigeria CAN don drag the Federal Government go court to challenge some provisions wen d government just add put for d Companies and Allied Matters Act 2020 wen dem dey call CAMA wen don cause plenty talk from here and there. For one statement wen their General Seceto Joseph Daramola drop on Monday, the Christian body say dem no dey ok with some provisions of CAMA 2020, and na dat reason nia come make dem carry d matter go court. Meanwhile, dem mention the case for the Federal High Court for Abuja, on Monday.
Ekiti state government don compensate police brutality victims
The Ekiti State government don present a total of N7.4 million give people wen suffer police brutality for the state. You go remember say for October 2020, many Nigerians ball enter the streets for many parts of the country dey protest against police brutality, dem come say make d federal government scrap d special anti-robbery squad (SARS) wen true true no dey function again. The state government come tender cheques of different amounts wen total N7.4 million give the first batch of those wen drop their petitions, based on the recommendations of the judicial panel wen Cornelius Akintayo dey lead.
33 per cent of our labour force no get job- Bureau of Statistics
Na a total of 23.18 million people for Naija nia either no do anything or work for less than 20 hours a week, and dis one so come make them unemployed during the fourth quarter (Q4) 2020. According to the Q4 report on unemployment wen Nigerian Bureau of Statistics (NBS) release on Monday, this one mean say 33.3 per cent of the labour force for Naija dey unemployed for d Q4 2020, from 27.1 per cent for second quarter of 2020. During the period, while the underemployment rate reduce from 28.6 per cent go 22.8 per cent, combination of both the unemployment and underemployment rate for this period wen dem soji give a total of 56.1 per cent.
Our Vaccine no dey cause blood clot- AstraZeneca
AstraZeneca don talk say d review wen dem carry out on Sunday no show any any evidence say their vaccine against the coronavirus dey cause blood clots, the same day wen Ireland and the Netherlands join d growing list of countries wen suspend the use of the shot. The company say one careful review of all available safety data no show any evidence of increased risk of pulmonary embolism, deep vein thrombosis or thrombocytopenia, for any defined age group, gender, batch or for any particular country,”. Them carry out d review wen cover more than 17 million people wen don receive the vaccine for Britain and the European Union, as Ireland and the Netherlands join Denmark, Norway, and Iceland.
Civil society blast FIRS ontop N1.4bn refreshment budget
Civil society organisations don condemn the N1.4bn wen d Federal Inland Revenue Service budget for meals and refreshments for the 2021 fiscal year. The groups wen include Transparency International and the Human Rights Writers Association of Nigeria, accuse the agency wen dey collect tax say dem no get conscience, say dem no know where dey pain dem. Executive Director, CISLAC and Head, Transparency International in Nigeria, Auwal Musa come talk say he shock say na dat kind big amount of money nia dem put for corner for enjoyment at a time wen the nation economy dey pass thru a lot.
Asari Dokubo don declare the formation of Biafra Customary Government
Asari Dokubo wen be leader of the Niger Delta Peoples Salvation Force, don declare the formation of Biafra Customary Government (BCG). Uche Mefor, BCG head of information and communications, say Dokubo still name those wen go serve as leaders for the government alongside himself. He come still talk say dem go arrange provincial structures for the new government.
APC Delta State: Make we work together- Omo-Agege
Deputy Presido of the Senate, Senator Ovie Omo-Agege, and the Founding leader of the All Progressives Congress (APC) for Delta State, Olorogun O’tega Emerhor don talk say need dey to end all the divisions wen dey play for the party for the state. Wen Omo-Agege and Emerhor dey yarn dis past weekend during one interview for Evwreni for Ughelli North LGA, dem come tell leaders of the party from the state to collabo and den work for unity of the party ahead of the 2023 general election for the state. Them come talk say na d division wen within the leaders of the APC for the state nia make dem perform badly for the 2019 general elections.
Premier League:Arsenal beat Tottenham 2-0
Arsenal show from back mama Totenham 2-1 for d game wen dem play for Emirate stadium on Sunday. This win come scatter d plan wen Tottenham been get to dey for the Premier League top four unto say e no come work again. Na Martin Ordegad and Alexander Lacazzet score the 2 goals wen make Arsenal win after Eric Kamela open scoring for Spurs.
Harry Kane fit join play on Sunday-Jose Mourinho
Jose Mourinho don talk say he believe say Harry Kane go dey fit to face Arsenal on Sunday despite say the striker need ice for him knee after he injure for d game wen dem play against Dinamo Zagreb. Kane score two times to give d Spurs better win for the first leg of their Europa League last-16 game wen dem play but dem come sharp sharp change am comot from d game wen he injure for the 82nd minute.
We no get land for ranching-South East Governors
The South East Governors Forum don talk say dem no get land for ranching for the region. Wen the forum dey yarn through their chairmo, Governor Dave Umahi of Ebonyi State, the governors say dem no go provide land for ranching among the states for the region as e take dey for the National Livestock Transformation Plan, NLTP of the federal government. The governor wen say dem no go contribute security personnel from different states, come still talk say need no dey to establish one joint regional security network for the states for d South East.