The Federal Government don promise to deal wit companies wen fail to obey the law wen dey guide the employment of qualified Nigerians as understudies for expatriates. The government through the Special Ministerial Task Force on Monitoring and Enforcement of Nigerian Expatriate Business Permit and Expatriate Quota Administration say dem don direct companies for the country to submit the Tax Identification Number, National Identification Numbers, Phone Number and Email Address of Nigerians wen dey understudy expatriates for their companies. Wen chairmo of the task force, Mr. Bola Ilori dey yarn wit news people on Sunday for Osogbo, he come talk say dem make the decision after one meeting with representatives of the Nigerian Immigration Service, Nigeria Labour Congress; Nigerian Bar Association; Nigerian Society of Engineers; other professional bodies and officials of d Ministry of Interior.
Join hand with new Orosuen-Elvis Eboh
The immediate past supervisor for Community, youth and sports development for Warri South LGA, Comrade Elvis Eboh don tell the people of Okere Urhrobo Kingdom to join hands with the new Orosuen, HRM Emmanuel Okumagba, Okumagba so dat development go fit take place. Wen comrade Elvis dey yarn during one interview for Warri, he come hail the Delta state Governor Dr. Ifeanyi Okowa for d way he take present d staff of office give HRM, say the king na man of peace. According to am, everybody must work together to strategically position the kingdom for more devidends of democracy
Iraq don issue arrest warrant for Donald Trump
Iraq judiciary say dem don give arrest warrant to outgoing U.S. Presido Donald Trump based on him connection with the killing of one Iranian general and one powerful Iraqi militia leader last year. Na one judge for Baghdad investigative court wen dey probe the Washington-directed drone strike wen kpuff Gen. Qassim Soleimani and Abu Mahdi al-Muhandis nia give d warrant on Thursday. Meanwhile na for outside the capital airport nia dem for kpuff d two both of dem last January.
No fire down with new electricity tariff-Saleh Mamman
Saleh Mamman, d minister on top power, don tell the Nigerian Electricity Regulatory Commission (NERC) say make dem no fire down wit the light bill wen dem review. On Tuesday, the commission approve increment for light bill for across the country. But for one statement on Thursday, the minister come talk say the light bill wen dem review go dey on hold until the conclusion of the joint ad hoc committee work by the end of January.
We never still see money FG promise us-ASUU
Leadership of the Academic Staff Union of Universities (ASUU) don talk say dem dey wait for the release of the N40 billion earned allowance wen the Federal Government promise the union, 12 days after dem call off the nine-month strike. ASUU end their strike on December 23, 2020, after one new deal with the government team wen Labour and Employment Minster Chris Ngige lead on December 22. ASUU come talk say the government don still fail to continue wit payment of the salaries of their members wen no enrol for the Integrated Personnel and Payroll Information System (IPPIS) after dem pay two months for d month of December.
Lai Mohammed don blast International Criminal Court
The Nigerian Minister of Information and Culture, Lai Mohammed don blast the International Criminal Court wen dey call for investigation into possible war crimes by the nation security forces, he come talk say dis one na “harassment.” For him first address wen he dey yarn wit news people for 2021, Mr. Mohammed say the action go fit “distract the soldiers from fighting bad people for the country”. He come talk say the ICC, and other organisations wen don condemn d President Muhammadu Buhari-led administration approach as per d management of human rights concerns na threat to Naija security.
One out of 5 people get Koro-WHO
Official data don show say one out of five persons wen den test for COVID-19 for Naija dey positive. Data from the World Health Organisation (WHO) show say the country positive rate jump from 4.2 percent go 21.3 percent for the last month. When one country positivity rate for the coronavirus dey high, experts believe say this one mean say d virus dey spread for the community.
NERC: We never increase light bill by 50 per cent
The Nigerian Electricity Regulatory Commission NERC on Tuesday afternoon say dem neva increase light bill by 50 per cent. The Commission for inside one statement talk say dat kind increment no dey for the tariff order for electricity distribution companies wen take effect on January 1, 2021. NERC come talk say the bill for customers wen dem dey serve less than an average of 12 hours of power supply per day for over a period of one month still remain frozen and say e dey subsidised in line with the policy direction of the Federal Government.
Delta State government don give staff of office to Orosuen of Okere-urhobo Kingdom
Delta state Governor, Dr Ifeanyi Okowa don present d staff of office give the Orosuen of Okere Urhobo kingdom, HRM Emmanuel Okumagba, Okumagba II. The Deputy Governor, Deacon Kingsley Otuaro wen represent Dr. Okowa for the ceremony wen shele for the Orosuen palace for warri, come talk say while the government no dey involve with the selection of traditional rulers, he say dem no go tolerate illegal traditional position for any part of the State. He come tell the people of Okere –Urhobo Kingdom say make dem support their new king so dat he go fit perform him duties well. Meanwhile, the Warri south Local Government chairmo, Michael Tidi don talk say the king, Emmanuel Okumagba dey very accommodating. Tidi come talk say he believe say him reign go bring more development to the kingdom.
Delta State: Police investigate girl wen die for hotel
Delta state Police command don launch one investigation after them see d dead body of one 18-year-old girl for one popular hotel for Owa Community, Ika North LGA Delta State last weekend. According to reports, d victim and two suspected internet fraudsters lodge for one hotel wen dey for along Efeizomor road. The alleged internet wayo wayo guys come cut out leave the girl while dem kala their mamu comot from the hotel. Meanwhile, nothing like stabbing and no sign of say dem strangle her die.