The Defence Headquarters don blast d report wen the United Nations drop say na 110 civilians nia Boko Haram badoo dem kpuff on Saturday wen dem attack farmers for the Jere Local Government Area of Borno State. Wen the Coordinator, Defence Media Operations, Maj. Gen. John Enenche dey yarn dis one dis morning, he come talk say na 43 dead body nia dem recovered from the matter for take play for the Zabarmari area of the northeast state. According to reports, the bad guys dem tie the farmers wen been dey work for their rice fields, before dem come cut their throats. But wen Enenche come dey react to d matter on Monday, he come talk say d military count the dead body dem together with the locals and say na 43 deaths nia dem record.
Delta State organize workshop for graduates wen no get job
The Delta State Government don organize one two-day Job Readiness Workshop for unemployed graduates under the Graduate Employment Enhancement Programme (GEEP) as part efforts to take create job for the unemployed youths for the State. Na d Delta State Job and Wealth Creation Bureau nia collabo with private partnership Foundation organize the two-day Job Readiness Workshop wen hold for Asaba. Wen the Chief Job and Wealth Creation Officer, Prof Eric Eboh dey declare open d workshop, he come talk say d essence of the workshops na to bring solution to the inadequacies and d lack of preparation of young graduates wen dey the labour market. Some of the people wen take part for d workshop come hail the state governor as them say d workshop go expose them to life skills and help dem get positive mind-set and attitude so dat dem go fit dey employable.
Ighedo statement na wrong statement- Ramson Onoyake
Chairmo of Uvwie LGA Ramson Onoyake don talk say d comment wen d Delta State Waste Management Board member Daniel Ighedo dey make say him administration dey stop the board from removing the place when people dey throw way dirty put wen don old for Orumaro community na very wrong statement. Wen Onoyake dey yarn dis past the weekend after he don go supervise the monthly environmental exercises for Effurun, he come talk say dem go need big money to take clear the dumpsite wen don pass 15-years old, say d matter go be too much of load for the LGA alone to fire down wit. Even as he dey talk say him administration dey work with the Waste Management Board and the Delta State Environmental taskforce to tackle the okpetu, he come advise d public office holders say make dem know wetin dey sup first before dem speak.
No put tinz for our water channel- Micheal Tidi
Chairmo of Warri South Local Government Area for Delta State, Dr. Michael Tidi, don order people for along the Pessu Market area of Warri River say make dem immediately stop to dey throw way their dirty for the water channel, say d government don decide to wake up commercial activities for Pessu Market and around. Dr. Tidi, give the order dis past weekend when he lead one team go inspect the ongoing reconstruction wen d government dey dp for Pessu Market Road even as he dey supervise this month environmental sanitation exercise. The Warri South Local Government Boss, wen come complain say he no like d way wen people for the area no take dey clean their environment, come talk say sanitation na both d responsibility of government and the people. He come talk say environmental laws for Naija dey very weak, den he come talk say him administration go introduce Executive Bill give Warri South Council Legislature and say once e become law, anybody wen do anyhow go see anyhow.
Covid-19: Naija record 198 new cases
The Nigeria Centre for Disease Control (NCDC) say Naija record 198 new COVID-19 cases on Wednesday and dis one so don carry the total number of infections for the country go 66,805. The number of people wen don legoo from d disease still dey for 1,169 unto say dem no record any death for the last 24 hours. The 198 new cases wen dem report na from 13 states and d states nia be FCT (53), Lagos (48), Ogun (40), Akwa Ibom (20), Bauchi (9), Plateau (8), Kaduna (5), Kano (4), Benue (3), Jigawa (3), Nasarawa(3), Edo (1), Kwara (1).
Police bullet nack three piple for Bayelsa
No be small matter nia play on Wednesday for the Edepie area of Yenagoa, Bayelsa State capital when one of the policemen wen dey on escort duty shoot anyhow and na so d bullet come hit one 17-year-old girl, one pastor wife and one trader wen dey for along the popular Tombia market area. The road wen dey lead to the Edepie roundabout from the Tombia end na home to the popular Tombia market and motor parks and na so traders wen dey shade enter the road dey cause serious hold up for the people wen dey drive and even those wen dey waka wit leg no dey find am easy at all. According to somebody wen dey there wen d matter take play, d go slow come hold the olokpa dem wen carry fash wen be about six in number, dem con come down from their motor and na so dem take start to dey shoot anyhow to clear the road so dat cars go fit pass. Unto say the traders no gree comot from the road, one of the kpokpo dem come parasid and as dem fire gunshots na so d bullets come take hit the victims.
Witness testify against Maina for im back
The trial of former chairmo of the Pension Reform Task Team wen no dey work again, Abdulrasheed Maina, on money laundering charges continue for him absence yesterday as one witness, Mrs. Rouquayya lbrahim, narrate how he take tiff more than N14billion from the federal pension account. Even as Mrs. Ibrahim dey testify before the Federal High Court for Abuja as the ninth prosecution witness, PW-9, she come talk say investigations show say Maina pina pension funds with the before before Head of Service of the Federation, Mr. Stephen Oronsaye. The witness wen be investigator with the Economic and Financial Crimes Commission, EFCC, wen dey attached to the Anti Money Laundering and Countering of Financing of Terrorism, AML/CFT unit, say she at a time na member of the pension fraud task team wen expose how Maina and him gang take dey use names of fake pensioners take dey gbanskele pepper. That same yesterday, one lawyer, Mr. Adeola Adedipe wen Maina dey use for him ongoing trial for money laundering, don apply to quit the case. Adedipe, when dey represent Maina company, Common Input Property and Investment Limited, clear the court as dem resume proceedings for the case say he don file notice say he dey withdraw from d case say he no do again.. The lawyer wen say him client neva pay am shi shi come apologise give the court for him absence from proceedings during some of the recent adjournments.
Senate fit confirm INEC chairmo for second term
Strong ideas show on Wednesday say the Senate go confirm Professor Mahmood Yakubu as the Chairmo of the Independent National Electoral Commission, INEC for second term on Tuesday, December 1. Just after the Senate leader, Senator Yahaya Abdullahi, All Progressives Congress, APC, Kebbi North read the Executive Communication from President Muhammadu Buhari for the Senate to consider the request of Mr. President on the confirmation of the nomination of Professor Mahmood Yakubu for Appointment as Chairmo of INEC in accordance with the provision of Section 154(1) of the Constitution of the Federal Republic of Nigeria, 1999( amended), the President of the Senate, Senator Ahmad Lawan come forward the name give d Committee on INEC. Senator Lawan come tell d committee to do screening on d nominee and den report back for their meeting wen go hold next week Tuesday, December 1, 2020.
Court start Nnamdi Kanu trial for im back
One federal high court for Abuja don set to start d trial of Nnamdi Kanu, leader of the Indigenous People of Biafra (IPOB),for him absence. One hearing notice from the court schedule the case for today November 26 during and na five prosecution witnesses nia go testify against Kanu. The court serve d notice give the federal government prosecution team and Ifeanyi Ejiofor, lawyer to Kanu. Meanwhile, Kanu dey face charges becos he try betray the federal government unto say he dey campaign for the Independent Republic of Biafra through IPOB.
Naija land borders go soon open- Zainab Ahmed
Naija land borders wen don dey closed since August 2019 go fit reopen soon. Na d Minister on top Finance, Budget, and National Planning, Zainab Ahmed nia yarn dis one for one interview wen she get with State House correspondents on Wednesday. Ahmed come talk say the presidential committee wen dem set up on the matter don complete their job and like dis dem dey say make dem reopen the borders.